HaNo-damene sesongstarta heime
|
HaNo-Herd 4-6. HaNo sitt damelag hang godt med mot Herd, men bortelaget vann sesongopninga på Nordøy stadion tysdag kveld. Trenar Hallgeir Remme har likevel tru på ein god sesong.
|
7-ar damer, 8.05.12,Nordøy stadion:
HaNo-Herd 4-6 (2-3)
Mål HaNo:
Cecilie Olsen og Cecilie Kalvøy 3.
Dommar: Christian Rønning, HaNo Fk.
Dagens HaNo-spelar: Cecilie Kalvøy.
HaNo stiller lag åleine i år etter to års samarbeid med Lepsøy IL. Men det er for første gong på mange år ikkje nok spelarar til å vere med i 11-arserien. 7-arkampen mot Herd var sesongopning for Hallgeir Remme sine disiplar. Kampen var jamn, men byjentene skåra to mål meir enn HaNo.
Ceciliane i skåringsform
Cecilie Olsen sørgja for ein god start på kampen med eit velplassert skot i hjørnet etter pasning frå midtbanemotor Lise T. Fjørtoft. Herd kom tilbake midtvegs i omgangen etter sjølvmål, og 1-2 kom etter angrep på Herd si venstreside. Cecilie Kalvøy utlikna til 2-2, før Herd gjekk til pause med 2-3.
- Mykje bra offensivt
- Vi slepp inn slurvemål dessverre, sa trenar Remme om den dårlege starten på 2. omgang. Han måtte sjå laget sitt sleppe inn tre mål, og med 2-6 var kampen kjørt. Ei oppmuntring var det likevel mot slutten, då dagens HaNo-spelar Kalvøy skåra to mål til. Med 4-6 fekk ikkje dei lyseblå poeng i serieopninga, men trenar Remme ser positivt på sesongen:
- Vi håpar på å kome mellom dei 3-4 beste i vår, slik vi kan spele i 1. divisjon 7-ar til hausten. Men når det er sagt har eg ikkje peiling på korleis motstandarane er. Vi har som hovudmålsetting å gjere kvar spelar betre og ha det kjekt i trening og kamp, seier Remme, som tidvis var nøgd med mykje av det offensive spelet i denne kampen.
PS! Sjølv om damelaget til HaNo spelar 7-arfotball, er det framleis ei ”HaNo-ramme” rundt heimekampane, med speaker-teneste, kåring av dagens HaNo-spelar, kiosk og ein del publikummarar på plass.
HaNo stilte med desse, sjå lagbilete nedom. Bak frå venstre: Trude Haram, Lise T. Fjørtoft, Cecilie Kalvøy, Eli Rogne, Cecilie Olsen, Judith Vestavik, trenar Hallgeir Remme. Framme frå venstre: Tone Elise Austnes, Solveig Aksnes, Hanna Sylte, Beate Austnes Nogva.
|