|
Dramatikk og tap
|
Damelaget spelte jamt med Sunnylven, men tapte likevel 0-2. Kampen vart stoppa i snart 45 minutt då ein av HaNo sine spelarar måte sendast med helikopter til sjukehus med sterke magesmerter. Heldigvis gjekk det bra.
|
HaNo - Sunnylven 0-2 (0-1)
Nordøy stadion
0-1 Kirsti Frøysadal Hauge (12)
0-2 Kirsti Frøysadal Hauge (82)
Dommar: Bjarte Steinsbu, Brattvåg
Juryen sin dom:
3 p: Lise Tomren Fjørtoft
2 p: Maria Ulla
1 p: Sybell Rogne
Tekst: Kenneth
Foto: Odd Einar
I vårkampen på Hellesylt, vann heimelaget heile 7-1 etter 6 mål av Kirsti Frøysadal Hauge. Laurdag spelte HaNo med god defensiv kontroll, og slapp gjestane til langt færre sjansar. Framover var det til tider god flyt i angrepsspelet, men det var langt mellom dei verkeleg store sjansane. For HaNo sin del skulle nok sesongen vart til jul. For framgangen er no merkbar frå kamp til kamp. Trass ein tung sesong så langt, klarte jentene å mobilisere til topp innsats også i kampen mot ein av årets overraskingar i 3. div kvinner. Med to kampar att, ligg Sunnylven på ein meget sterk 2. plass bak suverene Volda.
HaNo opna kampen best på ei våt Nordøy - bane laurdag. Forsvaret, med Sybell Rogne og Tone Austnes i spissen hadde god kontroll på gjestane sine raske angriparar. Og på midten tok veteranane Britt Tove Vedeld Molnes og Lise Tomren Fjørtoft kommandoen. HaNo rulla opp mange fine angrep, men utan å skape dei store sjansane. Det var difor ein kalddusj då Sunnylven skåra på sitt første skikklege angrep i kampen. Det starta med ei forsering og eit innlegg frå høgrekanten som Kirsti Frøysadal Hauge sette i mål frå kort hald.
Få minutt seinare starta dramatikken. Ein av HaNo sine spelarar fekk ein ball i magen, og måtte ut med smerter i magen. Smertane auka på, og det vart rekvirert ambulansehelikopter. Kampen vart stoppa då halvtimen av første omgang var spelt, slik at helikopteret fekk lande på bana. Det vart lange 40 minutt å vente for spelarar, publikum å støtteapparat å vente på at helikopteret, som var på anna oppdrag, skulle dukke opp. Heldigvis gjekk alt bra.
Laga vart enige om at 1. omgang verre varte i 30 minutt, og starta på att med 2. omgang etter ei kjapp oppvarming.
Siste del av kampen likna på den første. Begge lag hadde sine sjansar, men utan utteljing. Maria Ulla leverte ein solid kamp i HaNo sitt mål. Trygg i feltet, og med gode beskjedar. Forsvaret spelte konsentrert og godt kampen gjennom, og framover turte HaNo å halde i ballen og spele fotball. Anna Marøy Austnes var nær ved å utlikne, men keeper vann duellen. Lise Tomren Fjørtoft hadde eit godt skot som strauk stolpen, og det var fleire nestesituasjonar i feltet. Men Sunnylven har ein storskårar på laget, og Frøysadal Hauge avgjorde kampen då ho vende seg fri i feltet og skåra sikkert.
Ein jamn kamp enda med tap for HaNo, men det er mykje positivt å sjå. Ikkje minst er det kjekt når dei yngre på laget vil spele meir når dei vert bytta ut! Slik skal det vere!
To kampar står att, og det er mogeleg å ta poeng i begge.
|
