|
Gutelaget med tap i jamn kamp
|
Gutelaget tapte 5-1 i ein tidvis jamn kamp mot Brattvåg på Austnes gras, Fredag.
|
Kampen starta med mykje kriging på midtbana i ein kamp som elles var fattig på store og klare målsjansar. Dei første tjue minutta sto kampen og bølgja fram og tilbake, utan at nokon av laga klarte å legge press på det andre. Og den første store sjangsen kom ikkje før etter tjue minutt, då ein Brattvågspelar kom seg fri frå HaNo sitt forsvar og fekk avslutta. Men heldigvis for HaNo, gjekk avslutninga i stolpen og ut.
Berre to minutt seinare skulle Brattvåg gå opp i føringa, då Brattvåg fekk eit frispark på hjørnet av sekstenmeteren som vart slått inn i feltet. Keeper Sindre måtte gi retur, som tilslutt enda i skåring etter litt klabb og babb.
Etter dette fekk Brattvåg sett presset sitt lenger oppe i bana, og fekk dermed festa eit grep om kampen, utan at det skulle resultere i klare målsjangsar. For den neste sjangsen i kampen skulle ende i HaNo skåring. Etter 38 spelte minutt tok Tore Johan med seg ballen frå midtbana, og frå 25 meter plasserte han ballen fint oppe i høgre hjørnet i målet. Vakkert.
I pausa vart HaNo enige om å prøve å sette presset sitt høgare og å vere raskare i press, slik at Brattvåg skulle verte pressa lengre bak i bana.
Til trass for dei taktiske endringane var det Brattvåg som starta best, og ti minutt ut i omgangen hadde gultrøyene gått opp i 3-1 leiing. Utover i omgangen var det HaNo som hadde spelet, men utan at det vart omsett i sjangsar eller mål. Det nermaste ein kom redusering var ei god kontring som enda i eit godt skot frå Håkon. Uheldigvis gjekk det eit par meter over mål. Til slutt skulle Brattvåg vise seg som det laget som ville mest, og auka til 4-1 på eit skot frå 20 meter, og sette tilslutt punktum med 5-1 direkte frå frispark, eitt minutt på overtid.
Sjølv om det vart eit klart tap til slutt, so skal me ta med oss ein OK førsteomgong vidare og bygge på det fram mot neste kamp, som er borte mot Skodje på onsdag.
|
